குருஜியின் மாலைமலர் வார ராசிபலன்கள் (01-06-2020 முதல் 07-06-2020 வரை)

ஜோதிடக்கலை அரசு ஆதித்யகுருஜி

கைப்பேசி : 9768 99 8888

மேஷம்:

ராசிநாதன் செவ்வாய் பதினோராமிடத்தில் இருக்கும் இது. கரோனாவின் தயவால் இதுவரை இருந்த வேலை, தொழில் தடைகளை இனி சுலபமாக சமாளிப்பர்கள். சுறுசுறுப்புக்கும் விவேகத்திற்கும் அதிபதியான செவ்வாயின் ஆதிக்கத்தில் பிறந்தவர்கள் நீங்கள். உங்களை யாராலும் ஏமாற்ற முடியாது. நீங்களாகவே வலியப் போய் ஏமாந்தால்தான் உண்டு. செய்யும் முயற்சிகளில் இனிமேல் வெற்றி கிடைக்கும். எல்லா விஷயங்களிலும் இருந்து வந்த தடைகள் விலகும். முப்பது வயதுக்குட்பட்டவர்களுக்கு நல்ல திருப்பங்கள் இருக்கும். கவலைகள் தீரும் வாரம் இது.


படிக்கவோ, வேலை பார்க்கவோ இருந்த தடைகள் விலகி விட்டன. வியாபாரிகள், வட்டித் தொழில் செய்வோர், நீதித்துறையினர், வங்கிகளில் வேலைசெய்வோர் போன்ற துறையினருக்கு நல்ல பலன்கள் நடைபெறும். எதையும்சமாளிக்க முடியும். உங்களின் திடமான மன ஆற்றலும்; தைரியமும் வெளிப்படும் வாரம் இது. 4-ம்தேதி பகல் 1.07  மணி முதல் 6-ம்தேதி மாலை 3.12 மணி வரை சந்திராஷ்டம நாட்கள் என்பதால் இந்த நாட்களில் அறிமுகமில்லா ஆட்களிடம் தேவையின்றி விவாதங்களில் ஈடுபடுவதை தவிர்ப்பது நல்லது.

ரிஷபம்:

ராசிநாதன் சுக்கிரன் வக்கிரமாக இருந்தாலும் ராசியில் ஆட்சியாக உள்ள நல்ல வாரம் இது. எப்படிப்பட்ட பிரச்னைகள் இருந்தாலும் அது உங்களை நெருங்காது. தயக்கங்களை உதறினால் சாதிப்பீர்கள். ஆயினும் பங்குவர்த்தகம் போன்ற ஸ்பெகுலேஷன் துறைகளில் முதலீடு செய்ய வேண்டாம். முதலில் சிறிது வருமானம் வருவது போல தெரிந்தாலும் கடைசியில் உள்ளதும் போய் விடும். உடல்நலமில்லாமல்  இருந்தவர்கள் குணம் அடைவீர்கள். பழைய கடன்களை அடைக்க புதிய கடன்கள் கிடைக்கும். அதிக வட்டிக்கு கடன் வாங்க வேண்டாம்.

கோரனா பாதிப்பையும் மீறி வேலையில் திறமையைக் காட்ட முடியும். நண்பர்களால் மதிக்கப்படுவீர்கள். அந்தஸ்து, கௌரவம் இருக்கும். தெய்வ ஆசிர்வாதம் உண்டு. கணவன்-மனைவி உறவு நன்றாக இருக்கும். மனைவி சொல்லைக் கேளுங்கள். வாழ்க்கை மேம்படும். அரசு ஊழியர்கள் வளம் பெறுவார்கள். அரசியல்வாதிகள், வியாபாரிகள், விவசாயிகள் போன்ற அனைத்து தரப்பினருக்கும் இந்த வாரம் முதல் நன்மைகள் உண்டு. பெண்களுக்கு இது நல்ல வாரம். நீங்கள் சொல்லும் யோசனைகள் ஏற்கப்படும்.

மிதுனம்:

ராசிநாதன் புதன் இந்த வாரம் முதல் ராசியிலேயே இருக்கும் நிலை பெறுகிறார். இது மிதுனத்திற்கு யோகங்களைத் தரும் என்பது நிச்சயம். ஆனால் ராசியில் ராகுவுடன் புதன்  சம்பந்தப்படுவதால் உங்களிடம் எதிலும் ஒரு மனக்கலக்கம் இருக்கும். எதை நினைத்து கலங்குகிறோம் என்பதே தெரியாமல் தெளிவற்ற ஒரு நிலையில் இருப்பீர்கள். மனம் அமைதியற்று இருக்கும் வாரம் இது. குறைகள் எதுவும் இருக்காது. ஆயினும் கலக்கம் உண்டு. குறிப்பிட்ட பலனாக மற்றவர்களுக்கு உதவுவீர்கள்.

சிலருக்கு அஷ்டமச் சனியின் பாதிப்புக்கள் இருக்கும் என்பதால் சனிக்கிழமை தோறும் ஈஸ்வரன் கோவிலில் உள்ள காலபைரவருக்கு நல்லெண்ணெய் விளக்கேற்றி வழிபடுவது சிறந்த பரிகாரம். மறைமுக எதிர்ப்புகள் விலகும். தூர தேசங்களில் தொழில் வைத்திருப்பவர்கள் வெளிநாட்டுக் கம்பெனிகளில் வேலை செய்பவர்களுக்கு நன்மைகள் கிடைக்கும். தேவைப்படும் பணம் எப்படியும் கடைசி நேரத்திலாவது கிடைத்து விடும். தெய்வ வழிபாடு செய்வீர்கள். மாணவர்கள், கலைஞர்கள், வியாபாரிகள், தொழில் புரிவோருக்கு இனிமேல் கஷ்டங்கள் எதுவும் இல்லை.

கடகம்:

உழைப்பு கை கொடுக்கும் வாரம் இது. உங்களின் முயற்சி மட்டுமே இப்போது நிறைவான வெற்றியைத் தரும் என்பதால் உழைப்பவர்களுக்கு இந்த வாரம் நன்மைகள் உண்டு. நீங்களும் உழைப்பிற்கு அஞ்சாதவர்கள் என்பதை நிரூபிப்பீர்கள். கடகநாதன் சந்திரனும், யோகாதிபதிகள் சூரியனும், குருவும் நல்லநிலையில் இருப்பதால் மனமகிழ்ச்சியும் நிறைவான பாக்கியங்களும் கிடைக்கும் வாரம் இது. குடும்பத்தில் நல்ல விஷயங்கள் உண்டு.  கடகத்திற்கு கெடுதல்கள் சொல்ல எதுவும் இல்லை.

சிலருக்கு வீடு வாங்குவதற்கு இருந்து வந்த தடைகள் நீங்கி கட்டிய வீடோ அல்லது காலிமனையோ, வாங்க இப்போது ஆரம்பங்கள் இருக்கும். உங்களுக்கு கீழே வேலை செய்பவர்களிடம் இருந்து ஒத்துழைப்பு கிடைக்கும். சொந்த வாழ்க்கையிலும் வேலை, தொழில் அமைப்புகளிலும் ஏமாற்றத்தை சந்தித்து கொண்டிருக்கும் கடக ராசிக்காரர்களுக்கு மாற்றங்கள் இருக்கும். தந்தைவழியில் எல்லாவகையான ஆதரவுகளும் கிடைக்கும். ஆன்ம பலம் கூடும். மூத்த சகோதர சகோதரிகள் உதவுவார்கள். குடும்பத்தில் சுமுகமும் அமைதியும் இருக்கும்.

சிம்மம்:

சூரியன் வலுவாக இருப்பதால் சிம்மத்திற்கு குடும்ப மேன்மையும், வேலை, தொழில், வியாபாரம் அமைப்புகளில் நல்லவைகளும் வரக் கூடிய வாரம் இது. உடல்நலமில்லாமல் இருந்தவர்கள் முன்னேற்றம் பெறுவீர்கள். குடும்பத்தில் நன்மைகளும் நடைபெறும். பேரன், பேத்திகளைப் பற்றிய நல்ல செய்திகளும் கிடைக்கும். கோரனாவின் பாதிப்புகளையும் மீறி தொழில், வியாபாரம் போன்றவைகள் இனி முன்னேற்ற வழியில் இருக்கும். சகோதர உறவு நன்றாக இருக்கும். எந்த நேரமும் பரபரப்பாக இருப்பீர்கள். ஆனால் லாபங்கள் குறைவாக இருக்கும்.

எண்ணங்களிலும், செயல்களிலும் இதுவரை இருந்து வந்த தயக்கங்கள் நீங்கி புத்துணர்வு உண்டாகும் வாரம் இது. சுக்கிரன் வலுப் பெறுவதால் செயல்திறன் உண்டாகப் பெறுவீர்கள். ராசிநாதன் சூரியன் நல்ல நிலையில் இருப்பதால் இனிமேல் நல்லது நடக்கும். நான்கு பேர் இருக்கும் இடத்தில் உங்களின் பேச்சு கவனிக்கப்படும்.  தொழிலில்  இனி முன்னேற்றம் படிப்படியாக இருக்கும். வேலை செய்யும் இடத்தில் இனி நல்லபேர் எடுப்பீர்கள். தனஸ்தானம் வலுப் பெறுவதால் இனி பணம் வரும்.

கன்னி:

ராசிநாதன் புதன் பத்தாமிடத்தில் ஆட்சி நிலை அடைந்தாலும் ராகுவின் தொடர்பால் பாபத்துவம் பெறுவதால் கன்னிராசியின் செயல்கள் அனைத்திற்கும் இந்த வாரம் தடைகள் இருக்கும். உங்களில் சிலருக்கு எதிலும் ஒரு சந்தேகப் பார்வையும், யாரையுமே நம்ப முடியாத ஒரு மனசஞ்சலமும் இருக்கும். அதிகமாக நம்பிக்கை வைத்து நீங்கள் எதிர்பார்த்திருந்த ஒரு விஷயத்தில் தடைகள் வரும். குழந்தைகள் விஷயத்தில் செலவுகள் உண்டு. குறிப்பாக பெண் குழந்தைகளால் செலவுகள் இருக்கும்.

வார ஆரம்பத்தில் சில தவறுகளை செய்தாலும் வாரத்தில் இறுதியில் அவற்றை சீர்படுத்திக் கொண்டு உங்கள் செயல்திறனை காட்டுவீர்கள். கொரொனாவினால் சிக்கலில் இருக்கும் உங்களில் சிலருக்கு ஜூலை முதல் கஷ்டங்கள் விலகத் தொடங்கும். வேலை கிடைக்காமல் இருந்தவருக்கு வேலை கிடைக்கும். குடும்பத்தில் இருந்து வந்த மனக்கசப்புகள் விலகி, தீர்வுகள் தெரிய ஆரம்பிக்கும். தொழில் முன்னேற்றத்திற்கான அடிப்படை ஆரம்பங்கள்  நடக்கும். வியாபாரிகளுக்கு வருமானக்குறைவு இருக்காது.

துலாம்:

நல்லவைகளை தருபவர்களான புதனும், சுக்கிரனும் ஆட்சி நிலையில் இருப்பதால் துலாம்  ராசிக்கு கெடுபலன்கள் எதுவும் இல்லாத வாரம் இது. உங்களை இதுவரை எதிர்த்து வந்தவர்களும் மனம் மாறி உங்களை ஆதரிப்பார்கள். எதிர்பாராத உதவிகள் கிடைக்கும். வியாபாரம் மேம்படும். வேலை செய்யுமிடங்களில்  நல்ல பலன்கள் இருக்கும். குடும்பத்தில் உற்சாகமும், செழிப்பும் இருக்கும். கோரனாவின் தயவினால் கடந்த காலங்களில் நடந்த பிரச்னைகளில் இருந்து நீங்கள் மீண்டு வரும் வாரம் இது.

விவாகரத்து, செக் ரிட்டர்ன், வாடகை, சொத்துப் பிரச்னைகளால் கோர்ட்டுக்குச் சென்றவர்கள் சாதகமான திருப்பங்களை பெறுவீர்கள். தொழில் நஷ்டம், வேலையிழப்பு போன்றவைகளை சந்தித்தவர்கள் மாற்றங்கள் நடந்து ஏற்கனவே இருந்து வந்தவைகளை விட நல்ல வேலையை அடைவீர்கள். திருமணம் ஆகாதவர்களுக்கு நல்ல வரன்கள் அமையும். முதல் திருமணம் கசப்பாக அமைந்து விவாகரத்து பெற்றவர்களுக்கு இரண்டாவது வாழ்க்கை நல்ல முறையில் அமைவதற்கான ஏற்பாடுகள் நடக்கும். மேன்மைகளைத் தரும் வாரம் இது.

விருச்சிகம்:

விருச்சிகத்திற்கு வளர்பிறை காலம் இது. வார ஆரம்பத்திலேயே ஐந்துக்குடையவன் நீச்ச பங்கமாக இருப்பதும், சூரியன் சுபத்துவமாக ஏழில் அமைவதோடு, ராசிக்கு சுக்கிர பார்வை இருப்பதும் நன்மைகளை தரும் கிரக நிலைகள் என்பதால் விருச்சிகத்தில் பிறந்த அனைவருக்கும் இப்போது நல்லவைகள் நடக்கும். இதுபோன்ற நல்ல கோட்சார கிரக நிலை இருந்தும் ஒருவர் கஷ்டப்படுகிறார் என்றால் பிறந்த ஜாதகப்படி அவருக்கு கடுமையான தசா, புக்திகள் நடந்து கொண்டிருக்கும்.

வியாபாரிகளுக்கு தொழில் முன்னேற்றம் தரும். தொழிலை விரிவாக்கம் செய்ய இது நல்ல நேரம். சிலருக்கு வெளிமாநில, வெளிதேச நன்மைகள் இருக்கும். சிலர் தூர இடங்களில் இருந்து நல்ல தகவல்கள் பெறுவீர்கள். மூன்றாம் மனிதரின் தலையீட்டினால் குடும்பத்தில் இருந்த கருத்து வேற்றுமைகளும் வீண் பிரச்னைகளும் தீரும். யாராவது ஒருவர் கோபப்படாமல் பொறுமையையும் நிதானத்தையும் கையாண்டு சிறிய விஷயம் பெரிதாகாமல் பார்த்துக் கொள்வீர்கள். இனி உங்களுக்கு எந்தப் பிரச்னையும் வரப்போவது இல்லை.

தனுசு:

ராசிநாதன் குரு நீச்சபங்கம் அடைவதால் நிபந்தனைகளுக்குட்பட்ட நல்ல வாரம் இது. இதுவரை எந்த விஷயத்திலும் தடைகளைச் சந்தித்து, முட்டுச்சந்தில் போய் முட்டி நிற்பதைப் போல் உணர்ந்தவர்கள் இனி நன்மைகள் நடப்பதை உணருவீர்கள். பாக்கிய ஸ்தானாதிபதி சூரியன் சுபத்துவமாக இருப்பது யோகங்களை அளிக்கும் அமைப்பு என்பதால் இது உபயோகமுள்ள வாரம்தான். தனுசு ராசி இளையபருவத்தினர் எதிலும் இருக்கும் தயக்கத்தினை விட்டு ஒழியுங்கள். சுறுசுறுப்பாக ஆக்டிவாக இருங்கள்.

தொழிலில், வேலையில் நல்ல அனுபவங்களும், வளர்ச்சியும் இருக்கும். பிறரால் பாராட்டப் படுவீர்கள். குடும்பத்தில் நன்மை இருக்கும்.  கோரனாவையும் மீறி நல்லவைகள் நடக்கும். கிரகங்கள் சாதகமான நிலையில் இருக்கின்றன. சிறு வியாபாரிகளுக்கு கொடுத்த கடன் வசூலாகும். கொள்முதல் நன்றாக இருக்கும். சுக்கிர பலம் சாதகமாக இருப்பதால் கலைஞர்களுக்கு நல்ல வாரம் இது. பண வரவு மேன்மையாக அமையும். ஆன்மிக விஷயங்களில் ஈடுபாடு கொள்வீர்கள்.

மகரம்:

ராசியில் சனி, குரு, இரண்டில் செவ்வாய் என மகர ராசி இளைஞர்களின் மனம் எதிலும் நிலைகொள்ளாமல் சரியான முடிவுகள் எடுக்கத் தடுமாறும் கிரக நிலைகள் இப்போது இருக்கின்றன. மகரத்திற்கு சங்கடமான வாரம் இது. மனம் எதிலும் ஒரு முழுமூச்சுடன் ஈடுபடாது. முக்கிய முடிவுகள் எதுவும் இப்போது எடுக்க வேண்டாம். அதேநேரம் சிக்கல்கள் எதுவும் வராது. எதிலும் நேர்வழியில் செல்லுங்கள். குறுக்குவழி வேண்டாம். வேலை வாங்கித் தருவதாக எவராவது சொன்னால் முன்னாலேயே நம்பி பணம் தர வேண்டாம்.

வேலைக்காக அலைந்து கொண்டிருப்பவர்கள் கிடைக்கும் வேலையில் சேருங்கள். கௌரவம் பார்க்காதீர்கள். வீடு, வெளியிடம், அலுவலகம் எங்கும் யாரிடமும் சண்டை போடாதீர்கள். வாக்குவாதமும் செய்யாதீர்கள். கண்டிப்பாக குடிக்காதீர்கள். காதலிக்காதீர்கள். குடியும், காதலும் இளைஞர்களின் மனதை கட்டிப்போடும் சில வேலைகளைச் செய்யும். அவர்களின் ஆக்க சக்தியை இப்போது இழக்க வைக்கும். அவர்களை திசை திருப்பும். இளைஞர்களின் எதிர்காலம் இப்போது தீர்மானிக்கப் பட்டுக் கொண்டிருக்கிறது என்பதை மறவாதீர்கள்.   

கும்பம்:

இந்த வாரம் கும்ப ராசிக்காரர்களுக்கு எதிர்பார்க்காத இடங்களில் இருந்து லாபங்களும், பொருள் வரவும் கிடைக்கும். கிரகநிலைகள் சாதகமாக இருப்பதால் கும்பத்தினர் எதிலும் துடிப்புடன் இறங்கி செயலை முடித்து காட்டுவீர்கள்.. உங்களுக்கு ஆகாத எதிரிகளை நீங்கள் சிரித்த முகத்தோடு உறவாடிக் கெடுக்கும் வாரம் இது. சுக்கிரன் நான்கில் ஆட்சி பெறுவதால் இளைய பருவத்தினர் காதல் விவகாரங்களில் சிக்குவீர்கள். அதே காதல் இன்னும் இரண்டு வருடம் கழித்து மன அழுத்தத்தில் கொண்டு போய் விடும்.

வயதான அம்மாவை நன்கு கவனித்துக் கொள்ளுங்கள். சிலருக்கு சிகப்பு நிறமுடைய பொருட்களால் நன்மைகளும் பணவரவும் இருக்கும். குலதெய்வ வழிபாட்டை தள்ளிப் போட்டு வந்தவர்கள் உடனடியாக அதைச் செய்வது நல்லது. எந்த ஒரு இக்கட்டான சூழ்நிலையிலும் குலதெய்வமே நம்மைக் காப்பாற்றும். 31-ம்தேதி காலை 10.19 மணி முதல் 2-ந்தேதி காலை 11.59 மணி வரை சந்திராஷ்டம நாட்கள் என்றாலும் கெடுதல்கள் எதுவும் நடக்காது. இந்த தினங்களில் புதிய முயற்சிகளை ஆரம்பிக்க வேண்டாம்.

மீனம்:

உங்களுடைய செயல்திறமை, விடாமுயற்சி, கடும் உழைப்பு போன்றவை உங்களை ஒரு போதும் தோல்வியடைய வைக்காது என்பதால் மீனத்தினர் கவலைப்படத் தேவையற்ற வாரம் இது. மீனத்தினர் தற்போது அனுபவித்து வரும் மனக் கஷ்டங்களையும், பணப்பிரச்சினைகளையும் தீர்க்கும் அமைப்புகள் ஆரம்பமாகி விட்டன. இருக்கும் எல்லா பிரச்சனைகளும் இன்னும் சில வாரங்களுக்குள் நல்லவகையில் தீர்வுக்கு வரும். எதையும் சமாளிக்கும் மனோதைரியத்தை இறைவன் உங்களுக்கு அளிப்பார் என்பது உறுதி.

குடும்பத்தில் சுப நிகழ்ச்சிகள் நடைபெற ஆரம்பங்கள் உண்டு. வெளிநாடு சம்பந்தமான முயற்சிகள் எடுப்பவர்களுக்கு விசா போன்றவைகள் செப்டம்பர் மாதத்திற்கு பிறகு கை கொடுக்கும். கொரானாவினால் உலகமே தலைகீழாக இருப்பதால் எதிலும் அவசரப்படாமல் பொறுமை காப்பது நல்லது. 2-ம் தேதி காலை 11.59 மணி முதல் 4-ம் தேதி மதியம் 1.07 மணி வரை  சந்திராஷ்டம நாட்கள் என்பதால் இந்த நாட்களில் புதிய முயற்சிகள் வேண்டாம். யாருடனும் வாக்குவாதமோ சண்டையோ செய்யாதீர்கள். எதிலும் பொறுமையாக இருப்பது நல்லது.

அலுவலக நேரம்: 10:00 AM – 6:00 PM 

தொடர்பு எண்கள் செல்: +91 9768 99 8888, 8286 99 8888, 9107 99 8888, 8870 99 8888, 8681 99 8888 +91 44 2435 8888, +91 44 4867 8888.

குருஜி அவர்களின் கட்டுரை மற்றும் ராசிபலன்களை whatsapp ல் பெற  +91 8428 99 8888 என்ற எண்ணிற்கு தகவல் தரவும்.