குருஜியின் மாலைமலர் வார ராசிபலன்கள் (01.07.19 முதல் 07.07.19 வரை)

ஜோதிடக்கலை அரசு ஆதித்யகுருஜி

கைப்பேசி : 8681 99 8888

 மேஷம் :

ராசிநாதன் செவ்வாய் நீசனாக இருந்தாலும் குருவின் பார்வையில் இருப்பது யோக அமைப்பு. எனவே இந்த வாரம் மேஷத்திற்கு குறைகள் எதுவும் இல்லாத வாரமாக இருக்கும். குரு பகவானும் நட்பு வீட்டில் சுப வலுவாக உள்ளதால் பண வரவு இருக்கும். வாரம் முழுவதும் நான்கிற்குடைய சந்திரனும் வலுப் பெறுவதால் வேலை செய்யும் இடங்களில் இருந்த தொந்தரவுகள் நீங்கும். சிலருக்கு பதவி உயர்வு, சம்பள உயர்வு உண்டு. ஏற்றுமதி, இறக்குமதி தொழில் செய்பவர்கள் வளம் பெறுவார்கள். வெளிநாடு செல்லும் யோகம் உண்டு.

தாமதமாகி வந்த அனைத்து விஷயங்களும் தடைகள் நீங்கி மனம் போல் நடக்கும். இளைய பருவத்தினருக்கு திருமணம் நிச்சயம் ஆகும். தம்பதியினருக்கு புத்திர பாக்கியம் உண்டு. வயதானவர்கள் குடும்பத்தில் மதிக்கப்படுவார்கள். அவர்களின் ஆலோசனை ஏற்கப்படும். வழக்குகளால் அலைந்து கொண்டு நிம்மதி இழந்தவர்களுக்கு வழக்கு வெற்றி பெறும். எதிர்ப்புகள் விலகும். அரசு, தனியார் துறை ஊழியருக்கு இது நல்ல வாரம். கலைஞர்களுக்கு புகழும், வாய்ப்பும் வரும். விவசாயிகள், வியாபாரிகள் போன்றோருக்கு எதிர்பாராத லாபங்கள் உண்டு.

ரிஷபம்

ரிஷபத்திற்கு மனக்குழப்பங்கள் உள்ள வாரம் இது. சில விஷயங்களில் இது பாம்பா, கயிறா என்று அடையாளம் காண முடியாமல் தவிப்பீர்கள். இந்த வாரம் பிள்ளையையும் கிள்ளி விட்டு, தொட்டிலையும் ஆட்டி விடும் சம்பவங்கள் நடக்கும். செலவுகளும் விரயங்களும் இருக்கும். மூன்றில் செவ்வாய் நீசம் பெறுவதால் சிலருக்கு இளைய சகோதரரிடம் கருத்து வேறுபாடு வரும். தந்தைவழி உறவினர் வகையில் மனக்கசப்புக்கள் அல்லது பூர்வீகச்சொத்து விஷயத்தில் இடையூறுகள் இருக்கும். ஜீவனஸ்தானம் வலுவாக இருப்பதால் தொழிலில் வருமானங்களுக்கு குறை இருக்காது.

வேலையில் இருப்பவர்களுக்கு வேலைப்பளு அதிகமாக இருக்கும். அரசியல்வாதிகளுக்கு அதிகாரப் பதவி வரும். நகைச்சுவை நடிகர்களுக்கு நல்ல வாய்ப்பு கிடைக்கும். பங்காளிகளை நம்ப வேண்டாம். கலைஞர்களுக்கு வாய்ப்புக்கள் தேடி வந்தாலும் உழைத்த கூலியை பெறுவதற்கு போராட வேண்டி இருக்கும். திருமணம் ஆகாதவர்களுக்கு இந்தவாரம் திருமணம் நடப்பதற்கான உறுதி நிகழ்ச்சிகள் இருக்கும். கணவன் மனைவி உறவு சுமாராக இருக்கும். ஒரு சிலர் வெளிநாட்டுக்கு செல்வீர்கள். பணவரவில் குறையேதும் இல்லை.

மிதுனம்

ராசிநாதன் புதன் நீச செவ்வாயுடனும், யோகாதிபதி சுக்கிரன் ராசியில் ராகுவுடனும்  இணைந்திருப்பதால் எதிலும் நீங்கள் தெளிவின்றி இருக்கும் வாரம் இது. இரண்டில் நீசமாக இருக்கும் செவ்வாய் சிலரின் குடும்பத்தில் குழப்பங்களைத் தருவார். கவனமாக இருங்கள். புதிய நபர்களிடம் கொடுக்கல், வாங்கல் செய்ய வேண்டாம். உறவினர்கள், பங்காளிகள் போன்றோர்களால் செலவுகள் வருவதற்கு வாய்ப்பு இருப்பதால் எதிலும் யோசித்து தலையிடவும். வார இறுதியில் சுக்கிரன் மாறுவதால் இளைய பருவத்தினருக்கு வயதிற்கே உரிய உல்லாச அனுபவங்கள் ஏற்படும். பொதுவில் நிதானமான வாரம் இது.

விரயாதிபதி பாப வலுப்பெறுவதால் செலவுகள் கட்டுக்கடங்காமல் இருக்கும். திணறித்தான் போவீர்கள். மனைவி வழியில் நல்ல விஷயங்கள் உண்டு. மைத்துனர்கள் உதவுவார்கள். கூட்டுத் தொழில் சிறப்படையும். வாகன மாற்றம் உண்டு. வார பிற்பகுதியில் சந்திரன் சுபவலு பெறுவதால் சிலருக்கு முக்கிய மாற்றங்கள், பயணங்கள் இருக்கும். வெளிநாட்டு விஷயங்கள் கை கொடுக்கும். கடன் தொல்லைகள் கட்டுக்குள் இருக்கும். கடன் வாங்க வேண்டிய அவசியம் இருக்காது. உடல்நலம் இல்லாமல் இருப்பவர்கள் குணம் அடைவார்கள்.

கடகம்

கடக ராசிக்கு எதுவும் கை கொடுக்கும் வாரம் இது. இதுவரை கஷ்டப்பட்டு செய்த காரியங்கள் அனைத்தும் இனிமேல் அதிக முயற்சி இல்லாமலேயே வெற்றியாக நடந்து உங்களை ஆச்சரியத்திற்கு உள்ளாக்கும். உங்களில் சிலர் இப்போது புதிய மனிதராக உணர்வீர்கள். அரசியல்வாதிகளில் சிலருக்கு அதிகாரப் பதவிகள் கிடைக்கும். சொத்து பிரச்னைகள் உள்ளவருக்கு சாதகமான தீர்வு கிடைக்கும். பனிரெண்டுக்குடைய புதன் ராசியில் செவ்வாயுடன் இணைவதால் சிலருக்கு மாற்றங்களும், பிரயாணங்களும் இருக்கும். உறவினர்களால் லாபம் உண்டு.

உங்களில் சிலர் பழைய வாகனத்தை விற்று விட்டு புதிய வாகனம் வாங்குவீர்கள். சொந்த வீடு இல்லையே என்று ஏங்குவோரின் கனவு இனிமேல் நனவாகும். பொன், பொருள் சேர்க்கை இந்த வாரம் உண்டு. கஷ்டங்கள் இனிமேல் படிப்படியாக விலகத் தொடங்கும். ஒரு சிலர் வெளிநாடு செல்வீர்கள். குடும்பத்தில் இதுவரை இருந்து வந்த மனக்கசப்புகள் விலகி, தீர்வுகள் தெரிய ஆரம்பிக்கும். அரசு, தனியார்துறை ஊழியருக்கு இது நல்ல வாரமே. கலைஞர்கள் வளம் பெறுவார்கள்.

சிம்மம்

சுக்கிரன் லாபஸ்தானத்தில் ராசிநாதனுடன் இணைந்து அங்கே ராகுவும் இருப்பதால் உங்களில் இளைய பருவத்தினருக்கு ஜாலியான அனுபவங்கள் இருக்கும் வாரம் இது. கலைஞர்களுக்கும் நல்ல பலன்கள் இருக்கும். உல்லாசப் பயணம் செல்வீர்கள். தாயார் வழியில் நல்ல விஷயங்களும், அவர் மூலம் ஆதாயங்களும் இருக்கும். சொந்த வீடு இல்லாதவருக்கு வீடோ, மனையோ அமைவதற்கான ஆரம்பங்கள் இருக்கும். சிலர் வாகன யோகம் பெறுவீர்கள். அரசியல்வாதிகளுக்கு அதிகாரத்தை காட்டக்கூடிய சந்தர்ப்பங்கள் அமையும். கெடுதல்கள் இல்லாத வாரம் இது.

சுக்கிரனும் செவ்வாயும் நேர் வலுவிழந்து இருப்பதால் சொந்தமாக தொழில் தொடங்கவோ, இருக்கும் தொழிலை விரிவுபடுத்தவோ இப்போது வேண்டாம். ஒரு மாதம் தள்ளிப் போடுங்கள். ராசிநாதன் சூரியன் ராகுவுடன் இணைந்திருப்பதால் அவரின் முழு நன்மைகளும் கிடைப்பது கடினம். எனவே புதிய முயற்சிகள் இப்போது சிரமத்தை தரும். பூர்வ புண்ணிய ஸ்தானம் வலுவாக இருப்பதால் தெய்வ அருள் உங்களுக்கு உண்டு. வியாபாரிகளுக்கும் சுயதொழில் புரிவோருக்கும் கலைஞர்களுக்கும் நல்ல வாரம் இது. இளைஞர்களுக்கு வேலை விஷயத்தில் சில நல்ல அனுபவங்கள் இருக்கும்.

கன்னி

உங்களில் உத்திரம் நட்சத்திரக்காரர்களுக்கு இந்த வாரம் விரயங்களும், செலவுகளும் இருக்கும். பணவரவுக்கும் பஞ்சமிருக்காது. ஆனால் சேமிக்க முடியாமல் போகும். வீட்டிற்குப் பயந்து காதலை மனதிற்குள் பூட்டி ஒளித்து வைத்திருந்தவர்கள் தைரியம் வந்து பெற்றோரிடம் சொல்லி சம்மதம் பெறுவீர்கள். சிலருக்கு வழக்கு விஷயங்களில் வெற்றி கிடைக்கும். பெண்களுக்கு அலுவலகங்களில் இருந்து வந்த வேலைப்பளு குறையும். வீட்டிலும் உங்கள் பேச்சை மற்றவர்கள் கேட்பார்கள். சற்று நிம்மதியாக உணர்வீர்கள்.

சுக்கிரன் பத்தில் இருப்பதால் கலைஞர்களுக்கு நல்ல வாரம் இது. அரசியல்வாதிகள் வளம் பெறுவார்கள். வாரம் முழுவதும் சந்திரன் நல்ல அமைப்பில் இருப்பது வேலை, தொழில், வியாபாரம் போன்ற ஜீவன அமைப்புகளை வளப்படுத்தும் என்பதால் சுயதொழில் புரிவோருக்கும், வியாபாரிகளுக்கும் நல்ல வருமானம் இருக்கும்.  மகன், மகள்களால்  சந்தோஷம் இருக்கும். கணவன், மனைவி உறவு சிறப்பாக இருக்கும். வாழ்க்கைத்துணை கேட்கும் உதவிகளை செய்வீர்கள். நட்பு வட்டாரம் கை கொடுக்கும்.

துலாம்

சந்திராஷ்டம நிலையில் இந்த வாரம் ஆரம்பிப்பதால் முதல் மூன்று நாட்கள் மட்டும் சோம்பலான வாரம் இது. பிற்பகுதியில் சிலிர்த்து, எழுந்து விட்டுப் போன வேலைகளை நல்லபடியாக முடிப்பீர்கள். குடுகுடுப்பைக்காரனைப் போலச் சொல்வது என்றால் துலாம் ராசிக்கு நல்ல காலம் பிறந்து விட்டது. இதுவரை செட்டில் ஆகாதவர்கள் கூட இன்னும் இரண்டு வருடத்திற்குள் வாழ்க்கையின் அனைத்தும் நிறைவேறி செட்டில் ஆவீர்கள். துலாத்தினர் எதிர்காலத்தில் நன்றாக இருக்கப் போவதற்கான நிகழ்வுகள் நடக்கும் வாரம் இது.

எல்லாவகையான ஆதரவுகளும் கிடைக்கும். ஆன்மபலம் கூடும். மிகவும் நம்பிக்கையாக இருக்க முடியும். படிப்பு முடிந்து வேலைக்காக அலைந்து கொண்டிருந்தவர்களுக்கு வேலை கிடைக்கும். எதிலும் போட்டியைச் சந்தித்தவர்கள் இனிமேல் அது விலகுவதைக் காண்பீர்கள். சிலருக்கு தீர்த்த யாத்திரை, காசி, கயா போன்ற புனித ஸ்தலங்களை பார்த்தல் போன்ற ஆன்மீக நிகழ்ச்சிகள் நடைபெறும். 30 வயதுக்குட்பட்ட இளைய பருவத்தினருக்கு மாற்றங்கள் உண்டாகும். எதிர்பாராத பணவரவும் இந்த வாரம் இருக்கும்.

விருச்சிகம்

ஏழரைச் சனி முடியும் நிலைக்கு வந்து விட்டதால் விருச்சிகத்தினர் தாழ்வு மனப்பான்மையை உதறித் தள்ளுங்கள். இனி எல்லாம் நல்லபடியாக நடக்கப் போகிறது. யோகக்கிரகங்கள் வலுப்பெறுவதால் இனிமேல் எதையும் சமாளிக்கும் திறனும், தைரியமும் பெறுவீர்கள். சனியின் தாக்கத்தை சுலபமாக சமாளிப்பீர்கள். ராசிநாதனே ஆறுக்குடையவனுமாகி நீசம் பெறுவது சாதகமற்ற அமைப்புத்தான் என்றாலும் ராசியில் இருக்கும் குருவின் பார்வை செவ்வாய்க்கு இருப்பதால் கெடுதல்கள் எதுவும் இருக்காது.

கணவன்-மனைவிக்குள் இருந்து வந்த கருத்து வேறுபாடு விலகும். யாராவது ஒருவர் கோபம் தணிந்து விட்டுக் கொடுத்து போவீர்கள். பணவரவுக்கு தடை ஏதும் இல்லை. பொருளாதார நிலைமை நன்றாகவே இருக்கும். செவ்வாயின்  நீசபங்க வலுவால் தொழிலில் நல்லவை நடக்கும். 1,2,7,8, ஆகிய நாட்களில் பணம் வரும். 1-ம்தேதி இரவு 8.53 மணி முதல் 3-ம்தேதி இரவு 11.09 மணி வரை சந்திராஷ்டம நாட்கள் என்பதால் வீண் வாக்குவாதங்களோ தேவையற்ற பேச்சுக்களோ பேசாமல் இருப்பது நல்லது. புதிய முயற்சிகளும் வேண்டாம்.  

தனுசு

ஒன்பதுக்குடைய சூரியன் ராகுவுடன் இணைவு, ஐந்துக்குடைய செவ்வாய் நீசம் என்பதால் தனுசு ராசியினர் விரும்பாத அனைத்தும் நடக்கும் வாரம் இது. எதிலும் பொறுத்துப் போங்கள். யாரும் உங்களைப் புரிந்து கொள்ள மாட்டார்கள். எவரிடமும் இப்போது நம்பிக்கையைப் பெற முடியாது. தனுசுவிற்கு சங்கடமான வாரம் இது. ஜென்மச் சனி நடப்பதால் வாய்ப்புக்கள் எதையும் சரியாகச் செயல்படுத்த முடியாத நிலையும் இருக்கும். வியாபாரம், வேலை, தொழில் போன்ற ஜீவன அமைப்புகளில் தொந்தரவுகள் எதுவும் இருக்காது.

புதிதாக எந்த முயற்சிகளும் ஆரம்பிக்க கூடாது. இப்போது இருப்பதே நீடிக்கும்படி பார்த்துக் கொண்டாலே போதும். அறிமுகம் இல்லாத நபர்களிடம் கவனமாக இருங்கள். வங்கியிலிருந்து பணம் எடுத்து வரும்போது எச்சரிக்கை தேவை. ஏதேனும் ஒரு விஷயத்தில் குழப்பமாகி முடிவெடுக்க முடியாத நிலையில் இருப்பீர்கள். 5,6,7 ஆகிய நாட்களில் பணம் வரும். 3-ம் தேதி  இரவு 11.09 மணி முதல் 6-ம் தேதி அதிகாலை 0.18 மணி வரை சந்திராஷ்டம நாட்கள் என்பதால் நீண்டதூர பிரயணங்களோ எந்த ஒரு புதியமுயற்சியோ இந்த நாட்களில் செய்வதை தள்ளி வைப்பது நல்லது.

மகரம்

எட்டுக்குடைய சூரியன் ஆறில் ராகுவுடன் இணைவதால் மகரத்தினருக்கு இது சங்கடங்களும் அதற்கேற்ற தீர்வுகளும் கலந்த வாரமாக இருக்கும். உங்களில் கோர்ட் கேஸ் உள்ளவர்கள் கவனமாக இருக்க வேண்டும். வழக்கு இப்போது சாதகமாக இருக்காது என்பதால் தீர்ப்பு வருவதை தள்ளி வைக்க முயற்சிப்பது நல்லது. நடுத்தர வயதுக்காரர்கள் உடல்நலத்தில் அக்கறை எடுத்துக் கொள்ளுங்கள். கடன் வாங்க கூடிய அமைப்புகள் இருப்பதால் அனாவசிய தேவையற்ற செலவுகளுக்கு கடன் வாங்க வேண்டாம்.

தடைகளுக்குப் பிறகு நீங்கள் சாதனைகள் செய்யும் வாரம் இது. வார பிற்பகுதியில் யோகாதிபதிகள் வலுப்பெற்று இருப்பதால் துயரங்கள் எதுவும் இல்லை. உங்களை பிடிக்காதவரின் கை தற்காலிகமாக ஓங்கி இருக்கும் என்பதால் எதிலும் நிதானமாக செயல்படுங்கள். வீண்வாக்குவாதம் வேண்டாம். 1,4,6 ஆகிய நாட்களில் பணம் வரும். 6-ம்தேதி அதிகாலை 0.18 மணி முதல் 8-ம்தேதி அதிகாலை 1.47 மணி வரை சந்திராஷ்டம நாட்கள் என்பதால் நீண்ட தூர பிரயாணங்களை தள்ளி வையுங்கள்.

கும்பம் :

கும்பத்திற்கு இது நல்ல வாரமே. வருமானம் சிறப்பாக இருக்கும். உங்களில் அவிட்ட நட்சத்திரக்காரர்களுக்கு சிறப்பான பலன்கள் உண்டு. சிலருக்கு எதிர்பார்த்த பதவி உயர்வு கூடுதல் சம்பளத்துடன் கிடைக்கும். இளைய பருவத்தினருக்கு திருமணம் உறுதி ஆகும். செவ்வாய் நீசபங்கம் பெறுவதால் மருத்துவத்துறையினர், சிவில் இன்ஜினியர்கள், சிவப்புநிற பொருட்கள் சம்பந்தப்பட்டவர்கள், ரியல்எஸ்டேட் துறையினர், சீருடை பணியாளர்கள், காவல்துறை, ராணுவம் போன்றவர்களுக்கு நன்மைகள் இருக்கும்.

வெளிநாட்டில் இருக்கும் பிள்ளைகளுக்கு சுபகாரியம் நடத்த முன்னேற்பாடுகள் உண்டு. கலைஞர்களுக்கு நல்ல வாய்ப்புக்கள் வரும். சிலர் இந்த வாரம் புகழ் பெறுவீர்கள். மீடியா துறையினருக்கு அலைச்சல்கள் அதிகம் உண்டு. பேச்சுக்களில் நிதானம் தேவை. கணவன் மனைவி உறவில் கருத்து வேற்றுமைகள் இருக்கும். விட்டுக் கொடுத்துப் போவது நல்லது. பனிரெண்டில் கேது இருப்பதால் தெய்வ ஆசிர்வாதம் உண்டு. குலதெய்வ வழிபாடு செய்வீர்கள். ஞானிகள் தரிசனம் கிடைக்கும். ஆரோக்கிய குறைபாடு உள்ளவர்கள் முன்னேற்றம் காண்பார்கள்.

மீனம்

செவ்வாய் ஐந்தில் நீச வலுவுடன் குருவின் பார்வையில் இருப்பது மீனத்திற்கு சிறப்பான அமைப்பு. வாரம் முழுவதும் நல்ல செயல்திறனுடன் இருப்பீர்கள். நன்கு சிந்திப்பீர்கள். எதிர்காலத்திற்கு திட்டமிடுவீர்கள். தொழில் சிறப்படையும். வியாபாரம் விருத்தியாகும். வேலை செய்யும் இடத்தில் புகழ் பெறுவீர்கள். பதவி உயர்வு, சம்பள உயர்வு உண்டு. அரசு ஊழியருக்கு சம்பளம் தவிர்த்த இதர வருமானங்கள் சிறப்பாக இருக்கும். நீண்ட நாட்களாக முடியாமல் இருக்கும் ஒரு விஷயத்தை முடித்துக் காட்டி, மற்றவரின் பாராட்டைப் பெறுவீர்கள்.

சுயதொழில் செய்வோர் தொழில் முன்னேற்றத்திற்கான அடிப்படை நிகழ்வுகள் நடக்கும். வியாபாரிகளுக்கு வருமானக் குறைவு இருக்காது. இளைஞர்களுக்கு கெடுதல்கள் நடக்காது. வேலையில் பிரச்னை ஏற்பட்டு, வேலைமாற்றம் ஏற்பட்டவருக்கு வேலை அமையும். மனைவி, குழந்தைகள் மூலம் நல்ல நிகழ்ச்சிகள் இருக்கும். மாமியார் வீட்டில் மதிக்கப்படுவீர்கள். உங்களின் திடமான மன ஆற்றலும்; தைரியமும் வெளிப்படும் வாரம் இது. சந்திரன் வலுப்பெறுவதால் மிகுந்த உற்சாகத்துடன் செயல்படுவீர்கள். காரிய வெற்றி நிச்சயம் உண்டு.

(01.07.2019 அன்று மாலைமலரில் வெளி வருகிறது)

தொடர்பு எண்கள். செல்.8681 99 8888, 8870 99 8888, 8428 99 8888, 7092 77 8888, 8754 008888, 044-24358888, 044-48678888.

குருஜி அவர்களின் கட்டுரை மற்றும் ராசிபலன்களை whatsapp ல் பெற 8428 99 8888 என்ற எண்ணிற்கு தகவல் தரவும்.